老少女寓言

白女恨嫁日久，但一直明白不能亂嫁，要找到一個好男人才能嫁。

白女一直有一男友，可恨該男鈎三搭四，與好男人相距甚遠。該男曾向白女求婚，白女當然係睬你都傻。今番該男再向白女求婚，白女年紀漸長，十月芥菜，遂決定與該男談判。經過一番周旋，最後該男向白女承諾婚後每個周日不會去滾，只會留在家中陪伴白女。

白女身旁之姨媽姑爹大聲叫好：係囉，女人始終都係要嫁人嘅，呢個承諾有好男人成分，一於嫁啦~ 你只要日後同佢一齊，多啲包容佢，佢嘅好男人成分就會增加，慢慢佢就會變成真好男人。

唯白女之閨密力勸白女勿嫁該男，直指該男之承諾之虛假：你同佢一齊唔會有幸福架！你同意佢呢個所謂承諾，咪即係同意佢星期一至六出去滾？而且佢星期日個人喺屋企唧，佢都可以同其他女仔上網傾電話。你嫁咗之後，就更難叫佢唔好去滾架啦！女人一定要揾到個好男人先嫁架嘛~ 呢個係我地成班sis嘅信念嚟架，你唔記得嗱？

雖然白女之閨密所言甚是，白女堅持要嫁。白女閨密之一、一向對壞男人疾惡如仇的連女於婚禮當場忍不住辱駡白女，婚禮上各賓客為之側目。

老少女曰：壞男人並不會因為身旁女人的包容而變成好男人的。另一方面，道不同不相為謀，又何必為一自甘墮落之白女而有失斯文、影響一般人等對吾等女子之觀感？可知於尋覓好男人之路上，一般人等對吾等女子之支持係極為重要的。